မြန်မာဘလော့ဂါတစ်ယောက်၏ ဥရောပသွားတောလား

ကမ္ဘာ့အနောက်ခြမ်းမှကမ္ဘာလှည့်ခရီးသည် အလာများသည့်ပြင်သစ်နိုင်ငံပါရီမြို့သို့ လောလောလတ်လတ်ခရီးသွားခဲ့သော ဒိန်းမတ်နိုင်ငံရောက် ဘလော့ဂါခင်အောင်မြင့်၏ဥရောပသွားတောလားကို ကမ္ဘာတစ်လွှားက မြန်မာများအသံအဖြစ် ဖော်ပြလိုက် ပါသည်။
ယခုတစ်ခေါက် ဥရောပခရီးစဉ်အဖြစ် ပြင်သစ် နိုင်ငံကိုရွေးချယ်လိုက်ပြီးနောက် ကြိုတင်ပြင်ဆင်ထားမှုများကို ပြောရာတွင် ”တကယ်တော့ ပြင်သစ်နိုင်ငံပါရီမြို့အကြောင်း ရေးထားတဲ့စာအုပ်တွေဖတ်မိတိုင်း ပါရီကိုကျွန်တော့်စိတ်က သွားချင်နေတာပါ။ ၂ဝဝ၅ ခုနှစ် ဥရောပတိုက်ဒိန်းမတ်မြေပေါ် စပြီးခြေချကတည်းက နော်ဝေ၊ ဆွီဒင်၊ ဂျာမန်အစရှိတဲ့ ဥရောပ မြောက်ပိုင်းနိုင်ငံတွေမှာ မကြာခဏဆိုသလို တဝဲလည် လည် ခရီးတို၊ ခရီးရှည်တွေ များနေခဲ့ပါတယ်။ ခရီးတစ်ခုထွက်မယ်လို့ ဆုံးဖြတ်မိတိုင်း ကျွန်တော် အလည်သွားမယ့် နိုင်ငံရဲ့သမိုင်းနောက်ခံအနေအထားတွေကိုပဲ အဓိကထားအာရုံစိုက်မိတာ ကျွန်တော့်ရဲ့ ဝါသနာတစ်ခုပါ။ ဥရောပတိုက်မှာနေထိုင်၊ အလုပ်လုပ်ကိုင်သူဟာ အချိန်ကာလနဲ့ပတ်သက်ပြီး စကား ပြောကြတဲ့အခါ ရက်သတ္တပတ်နံပါတ်တွေကို ထည့်သွင်းပြောဆိုလေ့ရှိပါတယ်။ ရက်သတ္တပတ် နံပါတ် ၂၉၊၃ဝ၊၃၁ ဆိုတာ ဇူလိုင်လနောက်ပိုင်းနဲ့ သြဂုတ်လအစပိုင်း ရက်သတ္တပတ်တွေဖြစ်ကြပါတယ်။ အဲဒီအချိန်ဟာ ရာသီဥတုအနေအထား အေးမြလေ့ရှိတဲ့ ဥရောပတိုက်နေ ပြည်သူတို့အဖို့ အင်မတန် တန်ဖိုးကြီးတဲ့ နွေရာသီရဲ့အပူဆုံးအချိန်အခါဖြစ်ပါတယ်။ ဒါကြောင့်လုပ်ငန်းခွင်အသီးသီးက ကျွန်တော်တို့လို အလုပ်သမားတွေဟာအဲဒီအချိန်မှာ ခွင့်ရနိုင်ဖို့အရေး နှစ်လလောက်ကတည်းက ခွင့်စာကိုကြိုတင်ရပါ တယ်။ ပါရီမြို့တော်ကို ခရီးထွက်ဖို့ ရက်သတ္တပတ် အမှတ်(၂၉)ရဲ့ သောကြာနေ့ဖြစ်တဲ့ ဇူလိုင်လ(၁၉) ရက်နေ့ကို ကျွန်တော်ရွေးချယ်မိခဲ့ပါတယ်။ တိုက်တိုက် ဆိုင်ဆိုင် အာဇာနည်နေ့ပါ”ဟု ပြောသည်။
နိုင်ငံတကာ အနုပညာရှင်များ၊ စာပေပညာရှင် များ၊ နိုင်ငံရေးသမားများ၏ရနံ့များဖြင့် ကမ္ဘာလှည့် ခရီးသွားများကို အောင်မြင်စွာ ဆွဲဆောင်ထားနိုင်သော ဥရောပရာဇဝင်များ၏သတို့သမီးကိုပုံဖော်ရာ တွင်”ပါရီခရီးစဉ်အတွင်း ကျွန်တော်အဓိကထားသွား ခဲ့တဲ့နေရာအများစုကတော့ ပထမကမ္ဘာစစ်ပြီးကာစ ၁၉၁၈ ခုနှစ်ကနေ စပိန်နိုင်ငံပြည်တွင်းစစ်စဖြစ်တဲ့ ၁၉၃၆ ခုနှစ် ကြားကာလမှာ ပါရီမြို့တော် ဆင်ခြေ ဖုံးဒေသအသီးသီးမှာ နေထိုင်အသက်ရှင်သွားတဲ့ နိုင်ငံ တကာက အနုပညာရှင်တွေ၊ စာပေရှင်တွေ၊ နိုင်ငံရေးသမားတွေ နေထိုင်ခဲ့တဲ့ အခန်းငယ်လေးတွေ ဖြစ်ပါတယ်။ ပြင်သစ်နိုင်ငံမှာကမ္ဘာလှည့်ခရီးသည်တွေကို ဆွဲဆောင်နိုင်တဲ့အခြေခံအကြောင်းအရင်းတွေ ထဲမှာ အဲဒီအချက်ဟာလည်းအရေးကြီးတဲ့အချက်ပါ။ ဤအဆောက်အအုံတွင်ဘယ်နှစ်ခုနှစ်မှာ မည်သူတို့ နေထိုင်သွားပါသည်လို့ ကျောက်ပြားပေါ်မှာ စာတန်းတွေထွင်းပြီးချိတ်ဆွဲမှတ်တမ်းတင်ထားလေ့ရှိပါတယ်။ ကမ္ဘာကျော်ပန်းချီဆရာတွေဖြစ်တဲ့ ဗင့်ဆင့်ဗန်ဂိုး၊ ပီကာဆို၊ အမီနိုဗွန်ဂါဒီလီ၊ ကော်လီမွန့်၊ ဖီရက်မော်ဒီ ရန်တို့ ကျင်လည်လှုပ်ရှားခဲ့ရာ ‘မောင့်မတ်’တောင်ပေါ် ဘုရားနံဘေးကပန်းချီတန်းနဲ့ ပါရီမြို့လယ်က တက္ကသိုလ်တစ်ခုဖြစ်တဲ့ Institute France နောက်ကျောဘက်မှာရှိတဲ့ အနုပညာပြခန်းများဆီ လှည့်ပတ်ကြည့်ရှုခဲ့ပါတယ်။ ‘စိန့်’မြစ်ကမ်းတစ်လျှောက်မှာရှိနေတဲ့ ပြင်သစ်အတွေးအခေါ်ဖခင်ကြီးဗော်တဲယား၊ စာပေပညာရှင်ဗစ်တာဟူးဂိုး၊ ကဗျာဆရာကြီးဘိုဒလယ်တို့နေထိုင်ခဲ့တဲ့ အခန်းငယ်တွေဆီရောက်ခဲ့ပါတယ်။ ပါရီရဲ့ထူးခြားတဲ့မြင်ကွင်းတွေထဲမှာ စားသောက်ဆိုင်နဲ့ကဖေးဆိုင်ဟာလည်း ထင်ရှားတဲ့အခန်းကဏ္ဍမှာ ရပ်တည်နေကြပါတယ်။ ၁၇ ရာစု၊ ၁၈ ရာစုကစဖွင့်တဲ့ အဲဒီဆိုင်တွေဟာ ပိုင်ဆိုင်သူ အဆင့်ဆင့်သာ လက်ဆင့်ကမ်းခဲ့တယ်ဆိုပေမယ့် မူရင်းအနေအထား၊ အပြင်အဆင်တွေနဲ့ ရပ်တည်နေကြတာပါ။ သူတို့ဆိုင်တွေမှာ ဘယ်အချိန်၊ ဘယ်ကာလတွေတုန်းက ယနေ့ကမ္ဘာ့ အနုပညာနယ်ပယ်မှာ ထင်ရှားကျော်ကြားခဲ့တဲ့သူတွေ လာရောက်စားသောက်ခဲ့ပါတယ်ဆိုတဲ့ မှတ်တမ်းမှတ်ရာတိတိကျကျကို မှတ်တမ်းတင်ဖော်ပြထားလေ့ ရှိပါတယ်။ ပါရီမြို့တော်မှာဟိုတစ်ခေတ်ဆီက ကမ္ဘာကျော်အတွေးအခေါ်ပညာရှင်၊ စာရေးဆရာတွေဖြစ်တဲ့ ‘ယန်ပေါဆတ်’၊ သူ့ချစ်သူ ‘စီမွန် ဒီပိုဖွား’ တို့ အပါအဝင်ပညာရှင်ပေါင်းများစွာ နေ့စဉ်ကျင်လည်ခဲ့ကြတဲ့ ကမ္ဘာကျော်ကော်ဖီဆိုင်ကြီးဖြစ်တဲ့ Les Deus Magots နဲ့ သူ့နံဘေးမှာသူနဲ့ ခေတ်ပြိုင်နာမည်ကျော် ကော်ဖီ ဆိုင်ကြီးဖြစ်တဲ့ Cafe De Flore တို့ဟာ အတွေးအခေါ် အယူအဆချင်း ကွဲလွဲသူတွေ အုပ်စုဖွဲ့ထိုင်ခဲ့ရာ သမိုင်း ဝင်ကော်ဖီဆိုင်တွေပါ။ ရန်ကုန်၊ ၃၃ လမ်းက စာရေး ဆရာ၊ ကဗျာဆရာများ ကျင်လည်ရာ လေထန်ကုန်း လက်ဖက်ရည်ဆိုင်လိုပါ။ အဲဒီဆိုင်တွေကို ‘ပါရီလေ ထန်ကုန်း’လို့ ကျွန်တော့်အတွေးစိတ်ထဲမှာ နာမည် ပေးမိပါတယ်။ ပြင်သစ်နိုင်ငံနဲ့ ပါရီမြို့တော်ကြီးကို ထင်ရှားလူသိများစေခဲ့တဲ့ ပြင်သစ်တော်လှန်ရေးအဆင့်ဆင့်မှာ ထိပ်တန်းကနေ ပါဝင်ခဲ့သူတွေ တက်ရောက်ပညာသင်ကြားခဲ့ရာ’ဆော့ဘွန်း’ (College De Sorbonne) ကောလိပ်ဟာ ထင်ရှားတဲ့နေရာတစ်ခုပါ။ ပညာတတ်’အင်တယ်လစ်ကျူရယ်’ (intellectual) လူတန်းစားများနေထိုင်ရာ အဲဒီ’ဆော့ဘွန်း’တက္ကသိုလ် နားကရပ်ကွက် အမှတ် ၅၊ ၆၊ ၇ တို့ဟာ ရန်ကုန်တက္ကသိုလ်နံဘေးမှာရှိတဲ့ ‘ကမာရွတ်’ဒေသနဲ့ ခပ်ဆင်ဆင်ပါ။ ဒါကြောင့် အဲဒီဒေသကို ‘ပါရီကမာရွတ်’ လို့ ကျွန်တော့်စိတ်ထဲနာမည်ပေးမိပါတယ်”ဟု ဥရောပ သွားတောလားအကြောင်းကို မြန်မာတစ်ယောက်၏အမြင်ဖြင့် သုံးသပ်ပြောပြခဲ့သည်။
ဝ၃၇

Leave a Reply

Your email address will not be published.