ကျောင်းသားများအား အကြမ်းဖက်ဖြိုခွဲမှုအပေါ် နိုင်ငံတကာနှင့်ပြည်တွင်းအဖွဲ့များက ဝိုင်းဝန်းရှုတ်ချ

ရန်ကုန်၊ မတ် ၉

မြန်မာနိုင်ငံ၊ ရန်ကုန်မြို့နှင့် လက်ပံတန်းမြို့တို့တွင် လွန်ခဲ့သည့် သီတင်းပတ်အတွင်း အမျိုးသားပညာရေးဥပဒေ ပြင်ဆင်ရေး အတွက် ငြိမ်းချမ်းစွာ ဆန္ဒပြကန့်ကွက်နေ သော ကျောင်းသားများအား ရဲအဖွဲ့၏ အကြမ်းဖက် ဖြိုခွဲဖမ်းဆီးမှုများအပေါ် နိုင်ငံတကာလူ့အခွင့်အရေး အဖွဲ့များနှင့် ပြည်တွင်းအဖွဲ့အစည်းများက ဝိုင်းဝန်းပြစ်တင်ရှုတ်ချခဲ့ကြသည်။

ဝါရှင်တန်အခြေစိုက် လူ့အခွင့်အရေးစောင့်ကြည့်ရေးအဖွဲ့ (HRW) က ရဲအဖွဲ့၏အင်အား အလွန်အကျွံ သုံးစွဲဖြိုခွင်းမှုမှာ ကြောက်ခမန်းလိလိဖြစ်ကြောင်း ပြောကြားခဲ့သည်။ “ရဲအဖွဲ့အနေနဲ့ လူဆိုးသူခိုးလို အရပ်သားအရံအင်အားတွေကို အသုံးပြုခဲ့တာဟာ စစ်အစိုးရလက်ထက်နေ့ရက်တွေကို ပြန်ရောက် သွားတာဖြစ်တယ်။ ဒီဖြိုခွဲနှိမ်နင်းမှုကို နိုင်ငံတကာ အသိုင်းအဝိုင်းက ပြစ် တင်ရှုတ်ချသင့်ပါတယ်”ဟု HRW ၏အာရှဌာနခွဲ ဒုတိယညွှန်ကြားရေးမှူး ဖီ(လ)ရောဘတ်ဆန်က ပြောကြားခဲ့သည်။

ထို့အတူ လန်ဒန်အခြေစိုက် နိုင်ငံတကာလွတ်ငြိမ်းချမ်းသာခွင့်အဖွဲ့ (AI) ကလည်း အဆိုပါ ပြစ်တင်ရှုတ်ချမှုကို ထောက်ခံ ပြောကြားခဲ့သည်။ “အမြင်အယူအဆတွေကို ငြိမ်းချမ်းစွာ ထုတ်ဖော်မှုအတွက် ရဲအဖွဲ့ကအင်အား အလွန်အကျွံသုံးပြီး ထင်သလို ဖမ်းဆီးတဲ့သတင်းတွေကို စုံစမ်းစစ်ဆေးရမယ်”ဟု AI က ဆိုပါသည်။

အစိုးရဘက်တော်သားနှင့် ကြမ်းတမ်းရက်စက်ရာတွင် နာမည်ကြီးသည့် စွမ်းအားရှင်ခေါ် အဖွဲ့ဝင်များဟု အများက ထင်မြင်ယူဆသော လူဆိုးသူခိုးဆန်ဆန် အရပ်သားအရံအင်အားများ အသုံးပြုမှုကို ခွင့်ပြုထားသော ရာဇသတ်ကြီး ပုဒ်မ-၁၂၇ နှင့် ၁၂၈ ကဲ့သို့ ခေတ်မမီတော့သည့် ဗြိတိသျှကိုလိုနီအမွေများကို ဖယ်ရှားပစ်ရမည်ဟု နိုင်ငံတကာတရားသူကြီးများကော်မရှင် (ICJ) ၏ အာရှနှင့်ပစိဖိတ်ရေးရာဒေသ ညွှန်ကြားရေးမှူး ဆမ်(မ)ဇာရစ်က ဆိုသည်။

ရဲအဖွဲ့အပေါ် နိုင်ငံတကာ အသိုင်းအဝိုင်း၏ ပြစ်တင်ရှုတ်ချမှုများ အနှံ့အပြားဖြစ်ပွားနေစဉ် ၂၀၁၃ ခုနှစ်မှစ၍ မြန်မာ့ရဲတပ်ဖွဲ့အား ငွေကြေးထောက်ပံ့သင်တန်းပေးခဲ့သော ဥရောပသမဂ္ဂ၏ အခန်းကဏ္ဍကိုလည်း မေးခွန်းထုတ်မှု အများအပြား ပေါ်ပေါက်ခဲ့ရာ ယင်းအပေါ် အပြစ်တင်မှု လျော့ပါးရေးအတွက် မတ်လ ၆ ရက်နေ့တွင် ကျောင်းသားဆန္ဒပြမှုများနှင့်ပတ်သက်၍ မကြာ သေးမီက ပဋိပက္ခများအပေါ် စိုးရိမ်ပူပန်ကြောင်း ကြေညာချက်တစ်ရပ် ထုတ်ပြန်ခဲ့ရသည်။

အီးယူနှင့် ယူကေတို့ကို အဆိုပါ သင်တန်းပေးမှုများ ရုပ်သိမ်းရန် လှုံ့ဆော်ခဲ့သည့် ဘားမားကမ်ပိန်း ယူကေအဖွဲ့မှ ဒါရိုက်တာ မာ့(ခ) ဖာမနာကလည်း “သမ္မတ ဦးသိန်းစိန်နဲ့ မြန်မာ့ပြုပြင်ပြောင်းလဲမှုတွေကို ဝမ်းသာအားရ ထောက်ခံခဲ့ကြတဲ့ အမေရိကန်ပြည်ထောင်စုနဲ့ ယူကေလို နိုင်ငံတွေအနေနဲ့ အခုအချိန်မှာ ရှေ့ခြေတစ်လှမ်းတိုးဖို့ လိုနေပါတယ်”ဟု ပြောကြားခဲ့သည်။

အမေရိကန် နိုင်ငံခြားရေးဌာန ပြောခွင့်ရအမျိုးသမီး မေရီဟာ့(ဖ) ကလည်း အဆိုပါ အကြမ်းဖက် ရိုက်နှက်ဖမ်းဆီးမှု သတင်းများနှင့် ပတ်သက်၍ စိုးရိမ်ပူပန်ကြောင်း ဖော်ပြခဲ့သည်။

စနေနေ့တွင် မြန်မာ့ဒီမိုကရေစီရေး တက်ကြွလှုပ်ရှားသူများက ဝါရှင်တန်ဒီစီရှိ အိမ်ဖြူတော်နှင့် မြန်မာသံရုံး များရှေ့တွင် ဆန္ဒပြကျောင်းသားများနှင့် တစ်သားတည်း သွေးစည်းကြောင်းနှင့် ရဲအဖွဲ့၏အကြမ်းဖက်ဖြိုခွဲမှုကို ရှုတ်ချကြောင်း ဆန္ဒပြကန့်ကွက်မှုများ ပြုလုပ်ခဲ့သည်။ တစ်နေ့တည်းတွင် နော်ဝေနိုင်ငံ၊ အော်စလိုမြို့၌ ဖြစ်ပွားခဲ့ကာ ပြည်ပရောက် မြန်မာတက်ကြွလှုပ်ရှားသူများနှင့် ထောက်ခံသူများကလည်း ပါလီမန် အဆောက်အအုံရှေ့တွင် စုရုံးဆန္ဒပြခဲ့ကြသည်။

ထိုအတောအတွင်း မြန်မာ့အရပ်ဘက်လူမှုအဖွဲ့အစည်းများနှင့် နိုင်ငံရေးပါတီများ ၂၃ ဖွဲ့က အခြေအနေကို ငြိမ်းချမ်းစွာ ညှိနှိုင်းဆွေးနွေးဖြေရှင်းရန် သမ္မတ ဦးသိန်းစိန်ထံ တိုက်တွန်းသည့် ကြေညာချက်တစ်ခု ထုတ်ပြန်ခဲ့သည်။ အလားတူ မြန်မာ အစိုးရနှင့် အပစ်အခတ်ရပ်စဲထားသည့် ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) ကလည်း ကျောင်းသားများနှင့် ငြိမ်းချမ်းစွာဆန္ဒပြသူများအပေါ် အကြမ်းဖက်မှုအား ပြစ်တင်ရှုတ်ချသည့် ကြေညာချက်တစ်ရပ်ကို ထုတ်ပြန်ခဲ့သည်။

ဝ၂၅၊

Ref: Reuters, DVB

Leave a Reply

Your email address will not be published.