အကြမ်းဖက်အစွန်းရောက်ဝါဒ ဆန့်ကျင်ရေးတိုက်ပွဲ

အမေရိကန်ပြည်ထောင်စုဟာ အကြမ်းဖက်ဝါဒကို ဆန့်ကျင်တိုက်ဖျက်ရာမှာ အရေးပါတဲ့ အောင်မြင်မှုတွေရခဲ့ပါတယ်။ ကျွန်တော်တို့အနေနဲ့ အယ်(လ)ခိုင်ဒါ ခေါင်းဆောင်ပိုင်းရဲ့ ဗဟိုချက်ကို ဖျက်ဆီးပစ်နိုင်ခဲ့ပြီး အမိမြေလုံခြုံရေးကို အား ကောင်းခိုင်မာစေကာ နောက်ထပ် ၉/၁၁ လို အကြီးစားတိုက်ခိုက်မှုကို ကြိုတင်ကာကွယ်ဖို့ လုပ်ဆောင်နိုင်ခဲ့ပါတယ်။

တစ်ချိန်တည်းမှာ ခြိမ်းခြောက်မှုကတော့ ဆက်ရှိနေပါတယ်။ ယီမင်နိုင်ငံမှာ ပေါင်းစည်းထားတဲ့ အယ်(လ)ခိုင်ဒါဟာ ကျွန်တော်တို့ကို ဆန့်ကျင်တိုက်ခိုက်ဖို့ အစီအစဉ်တွေ တက်တက်ကြွကြွလုပ်ခဲ့ကြတယ်။ ၉/၁၁ ကတည်းကစလို့ အကြမ်းဖက် ဝါဒီတွေဟာ လစ်ဗျားနိုင်ငံ၊ ဘင်ဂါဇီမြို့က တိုက်ခိုက်မှုတွေအပါအဝင် ပင်လယ်ရပ်ခြားက အမေရိကန်နိုင်ငံသားတွေကို သတ်ဖြတ်ခဲ့ကြတယ်။ ဒီအမေရိကန်ပြည်ထောင်စုမှာတင် ဘော်စတွန်မာရသွန်ပြေးပွဲနဲ့ Ft.Hood တို့မှာ အမေရိကန်တွေ အများအပြား အသတ်ခံခဲ့ရတယ်။

ဆီးရီးယားနဲ့ အီရတ်မှာ အိုက်ဇဲ(လ) (ISIL) လို့ခေါ်တဲ့ အကြမ်းဖက်အဖွဲ့ဟာ အပြစ်မဲ့အရပ်သားတွေကို အစုလိုက် အပြုံလိုက်သတ်ဖြတ်ခဲ့ပြီး အမေရိကန်တွေ အပါအဝင် ဓားစာခံတွေကိုလည်း သတ်ဖြတ်ကာ သူတို့ရဲ့ အရိုင်းအစိုင်းဝါဒကို အီဂျစ်ခရစ်ယာန်တွေကို သတ်ပြခြင်းနဲ့ လစ်ဗျားအထိ ဖြန့်ကြက်ခဲ့ကြတယ်။ ပြီးခဲ့တဲ့လတွေအတွင်း အော့တဝါ၊ ဆစ်ဒနီ၊ ပါရီနဲ့ ကိုပင်ဟေဂင်မြို့ကြီးတွေမှာလည်း လူအသေအပျောက်များတဲ့ သူတို့ရဲ့တိုက်ခိုက်မှုတွေကို ကျွန်တော်တို့ တွေ့မြင်ခဲ့ရတယ်။ ဒီလိုပဲ ပါကစ္စတန်တာလီဘန်တွေကလည်း ကျောင်းသားငယ်လေး ၁၀ဝ ကျော်နဲ့ သူတို့ရဲ့ဆရာတွေကို သတ်ခဲ့တာပါ။ အယ်(လ)ရှာဘတ်အဖွဲ့ကလည်း ဆိုမာလီယာကနေ အရှေ့အာဖရိကတစ်ခွင်လုံးအထိ တိုက်ခိုက်သတ်ဖြတ်မှုတွေ လုပ်ခဲ့ကြ တယ်။ နိုက်ဂျီးရီးယားနဲ့ အိမ်နီးချင်းနိုင်ငံတွေမှာဆိုရင် ဘိုကိုဟာရမ်အဖွဲ့ဟာ ယောကျာ်း၊ မိန်းမနဲ့ ကလေးပါမကျန် ပြန်ပေး ဆွဲတာ၊ သတ်ဖြတ်တာတွေ လုပ်ခဲ့ကြတယ်။

ဒီစိန်ခေါ်မှုကြီးနဲ့ ရင်ဆိုင်နေရတဲ့ အချိန်မှာ ကျွန်တော်တို့အနေနဲ့ နိုင်ငံတကာအတိုင်းအတာအရရော ပြည်တွင်းမှာပါ ညီညီ ညွတ်ညွတ် ရပ်တည်ရမှာပါ။ ဒီပြဿနာကို စစ်ရေးအင်အားသက်သက်နဲ့ ဖြေရှင်းလို့မရဘူးဆိုတာ ကျွန်တော်တို့ သိပါတယ်။ အပြစ်မဲ့ အရပ်သားတွေကို သတ်နေကြတဲ့ အကြမ်းဖက်ဝါဒီတွေကို ရိုးရိုးလေးနဲ့တော့ ကျွန်တော်တို့ အမြစ်မဖြတ်နိုင်ပါဘူး။ ကျွန်တော်တို့ဟာ ကိုယ်တိုင်အကြမ်းဖက်လုပ်ဆောင်မှုတွေမှာ တိုက်ရိုက်မပါဝင်ပေမဲ့ တခြားလူတွေကို အကြမ်းဖက် လုပ်ရပ်တွေလုပ်ဖို့ အစွန်းရောက်အယူအဆတွေ သွတ်သွင်းပေး၊ လူသူစုဆောင်းပေးပြီး သွေးထိုးလှုံ့ဆော်မှုတွေလုပ်နေကြတဲ့ ဝါဒဖြန့်ချိရေးသမားတွေ၊ လူသစ်စုဆောင်းသူတွေနဲ့ အထောက်အကူပေးသူတွေ၊ အကြမ်းဖက်အစွန်းရောက်ဝါဒီတွေကိုလည်း ရင်ဆိုင်ရမှာဖြစ်ပါတယ်။

ဒီအပတ်ထဲမှာ နိုင်ငံပေါင်း ၆၀ ကျော်က အစိုးရတွေ၊ အရပ်ဘက်လူမှုအဖွဲ့အစည်းတွေနဲ့ လူမှုအသိုင်းအဝိုင်း ခေါင်းဆောင်တွေ ဟာ အကြမ်းဖက် အစွန်းရောက်ဝါဒကို တန်ပြန်ရေးဆိုင်ရာ ကမ္ဘာ့ထိပ်သီးအစည်းအဝေးတစ်ခုလုပ်ဖို့ ဝါရှင်တန်မြို့တော်မှာ စုရုံးခဲ့ကြပြီး အရေးကြီးတဲ့ရှေ့ခြေလှမ်းတစ်လှမ်းကို လုပ်ဆောင်သွားကြမှာပါ။ ဒီမှာ ကျွန်တော်တို့ရဲ့ အထူးပြုမှုကတော့ ဒေသခံ လူမှုအသိုင်းအဝိုင်းတွေကို စွမ်းရည်မြှင့်တင်ပေးဖို့ ဖြစ်ပါတယ်။

အယ်(လ)ခိုင်ဒါနဲ့ အိုက်ဇဲ(လ) (ISIL)လို အဖွဲ့တွေဟာ ကမ္ဘာ့မွတ် စလင်လူထုအများစုကြီးက ပယ်ချခဲ့ကြတဲ့ ပုံဖျက်ထား တဲ့ ဘာသာရေးအဓိပ္ပာယ်ဖော်မှုတစ်ခုကို တိုးမြှင့်ဖြန့်ဖြူးနေကြပါတယ်။ ကမ္ဘာကြီးအနေနဲ့ အစ္စလာမ်ဘာသာရဲ့ တကယ် ငြိမ်းချမ်းတဲ့သဘာဝကို သင်ကြားပေးနေသူ မွတ်စလင်ဘာသာရေးခေါင်းဆောင်တွေနဲ့ ဘာသာရေးပညာရှင်တွေရဲ့ အသံကို ကျယ်ကျယ်ပြန့်ပြန့် မြှင့်တင်ပေးရမယ်။ ကျွန်တော်တို့က အကြမ်းဖက်သမားတွေဟာ အစ္စလာမ်ဘာသာကို ဘယ်လိုဖောက်လှဲ ဖောက်ပြန်လုပ်ခဲ့တယ်ဆိုတာသိတဲ့ အစွန်းရောက်ဝါဒီဟောင်းတွေရဲ့ သက်သေခံချက်တွေကို ပဲ့တင်ထပ်ပေးနိုင်ပါတယ်။ အင်တာနက်ပေါ်က အစွန်းရောက်သမားတွေရဲ့ပြောဆိုချက်တွေကို တန်ပြန်ဖို့ လူမှုမီဒီယာအသုံးအဆောင်တွေ တိုးတက်အောင် ပုဂ္ဂလိကကဏ္ဍနဲ့ အလုပ်တွဲလုပ်မယ့် မွတ်စလင် စွန့်ဦးတီထွင် လုပ်ငန်းရှင်တွေနဲ့ လူငယ်တွေကို ကျွန်တော်တို့ ကူညီနိုင်တယ်။

လူတွေ အထူးသဖြင့် လူငယ်တွေကို အကြမ်းဖက်အစွန်းရောက်တွေရဲ့ ကျော့ကွင်းထဲရောက်မသွားအောင် ကာကွယ်ဖို့ အကောင်းဆုံးနည်းလမ်းကတော့ သူတို့ရဲ့ မိသားစု၊ မိတ်ဆွေတွေ၊ ဆရာသမားတွေနဲ့ ဘာသာရေးခေါင်းဆောင်တွေကို ထောက်ကူပေးတာပဲဆိုတာ အတွေ့အကြုံကတစ်ဆင့် ကျွန်တော်တို့ သိခဲ့ကြရတယ်။ အခုအပတ်မှာကျင်းပမယ့် ထိပ်သီး အစည်းအဝေးမှာ လော့(စ)အိန်ဂျလိ (စ)၊ မင်နီယာပိုလစ်(စ)နဲ့ဘော့စတွန်မြို့တွေက လူမှုအသိုင်းအဝိုင်းခေါင်းဆောင် တွေက သူတို့မြို့တွေမှာရှိတဲ့ လူမှုအသိုင်းအဝိုင်းတွေအတွက် သူတို့ချစ်တဲ့သူတွေကို အစွန်းရောက်ဝါဒသဘောတရားတွေကနေ ကာကွယ်ဖို့ အားဖြစ်စေမယ့် တီထွင်ဖန်တီးမှုရှိရှိ မိတ်ဖွဲ့လုပ်ဆောင်မှုတွေကို အလေးပေးဆွေးနွေးကြပါလိမ့်မယ်။

ပိုပြီး ကျယ်ကျယ်ပြန့်ပြန့်တွေ့ရတာကတော့ လူတွေက တရားမမျှတမှုနဲ့ အကျင့်ပျက်ခြစားမှုတွေကြောင့် သူတို့ဘဝတွေ တိုးတက်ဖို့ အခွင့်အလမ်းမရှိအောင် ဖြစ်နေတယ်လို့ ခံစားနေရတဲ့အခါမျိုးမှာ အယ်(လ)ခိုင်ဒါနဲ့ အိုက်ဇဲ(လ)လို အဖွဲ့တွေက သူတို့ရဲ့ကြီးထွားလာတဲ့ ဒေါသအဆောက်အအုံကို အသုံးချတတ်ကြတယ်။ ကမ္ဘာကြီးက ဒီနေ့လူငယ်တွေကို ပိုကောင်းတဲ့အရာ တစ်ခုခုပေးရမှာပါ။

လူ့အခွင့်အရေးကို ငြင်းဆိုကြတဲ့ အစိုးရတွေဟာ အပြောင်းအလဲဖြစ်ဖို့ တစ်ခုတည်းသောနည်းလမ်းဆိုတာ အကြမ်းဖက် တာဖြစ်တယ်လို့ ပြောတတ်ကြတဲ့ အစွန်းရောက်တွေရဲ့ထောင်ချောက်ထဲကို ကျရောက်သွားလေ့ရှိကြတယ်။ နိုင်ငံသားတွေ အနေနဲ့ သူတို့ရဲ့ဥပဒေနဲ့ညီတဲ့ မကျေနပ်ချက်တွေကို ဒီမိုကရေစီကျတဲ့လုပ်ငန်းစဉ်နဲ့ ဖြေရှင်းနိုင်ပြီး ခိုင်မာတဲ့ အရပ်ဘက်လူမှု အဖွဲ့အစည်းကနေ သူတို့ခံစားချက်တွေကို ဖော်ထုတ်ပြသနိုင်မှသာ အကြမ်းဖက်အစွန်းရောက်ဝါဒကို တန်ပြန်ဖို့ ကြိုးပမ်း အားထုတ်မှုတွေဟာ အောင်မြင်ပါလိမ့်မယ်။ ဒီကြိုးပမ်းမှုတွေဟာ ဂုဏ်သိက္ခာရှိတဲ့ ဘဝမျှော်လင့်ချက်ရရှိစေဖို့ စီးပွားရေး၊ ပညာရေးနဲ့ စွန့်ဦးတီထွင်မှုဆိုင်ရာ တိုးတက်မှုတွေနဲ့ လိုက်လျောညီထွေရှိရမှာဖြစ်တယ်။

နောက်ဆုံးအချက်အနေနဲ့ အမေရိကန်ပြည်ထောင်စုဟာ အစ္စလာမ်ဘာသာနဲ့ စစ်ဖြစ်နေပြီဆိုတဲ့ အယ်(လ)ခိုင်ဒါနဲ့ အိုက်ဇဲ(လ)တို့ရဲ့ လိမ်ညာဆွယ်တရားဟောမှုနဲ့အတူ ကျွန်တော်တို့အားလုံးမှာ အမေရိကန်တွေရယ်လို့ ကျွန်တော်တို့ကို သတ် မှတ်ပေးတဲ့ ဗဟုဝါဒတန်ဖိုးတွေကို မြဲမြဲစွဲကိုင်ပြရမယ့် အခန်းကဏ္ဍတစ်ခုရှိနေပါတယ်။ ဒီအပတ်မှာ ကျွန်တော်တို့ဟာ နေ့စဉ် နေ့တိုင်း ကျွန်တော်တို့တိုင်းပြည်အတွက် ထူးထူးကဲကဲ ပေးဆပ်မှုတွေ ပြုလုပ်နေကြတဲ့ မွတ်စလင်အမေရိကန်တွေ အပါအဝင် ယုံကြည်ကိုးကွယ်မှုပေါင်းစုံရှိတဲ့သူတွေနဲ့ တွေ့ဆုံကြရမှာဖြစ်ပါတယ်။ ဒါက ကျွန်တော်တို့ဟာ ယုံကြည်မှုပေါင်းစုံနဲ့ မတူကွဲပြားတဲ့ နောက်ခံရှိသူအားလုံးကို ကြိုဆိုလက်ကမ်းတာကြောင့် အမေရိကအောင်မြင်ရတာဖြစ်တယ် ဆိုတဲ့အချက်ကို သတိပေးနှိုးဆော်နေတဲ့အရာတစ်ခုပါ။

ဒီဗဟုဝါဒဟာ တစ်ခါတစ်ခါမှာ ယုံကြည်ကိုးကွယ်မှုအမျိုးမျိုးကလာတဲ့ အမုန်းတရားလက်ကိုင်ထားရာ သဘောတရား အယူအဆတွေနဲ့ တစ်ဦးချင်းလူပုဂ္ဂိုလ်တွေရဲ့ ခြိမ်းခြောက်မှုကို ခံခဲ့ရတယ်။ ၂၀၁၂ ခုနှစ်မှာ ဝင်စကွန်ဆင်ပြည်နယ်က ဆစ်(ခ)ဘုရားကျောင်းနဲ့ မနှစ်ကကင်းဆတ်(စ)ပြည်နယ်ထဲက ဂျူးလူမှုအသိုင်းအဝိုင်းတစ်ခုမှာ ကြေကွဲဖွယ်ရာ သတ်ဖြတ်မှု တွေကို ကျွန်တော်တို့ တွေ့မြင်ခဲ့ကြရတယ်။

နယူးကက်ဆယ်ပြည်နယ်၊ ချက်ပယ်(လ)တောင်ကုန်းမှာ အမေရိကန်မွတ်စ လင်လူငယ်သုံးဦး ဘာကြောင့်ရက်ရက်စက်စက် သတ်ဖြတ်ခံခဲ့ရတယ်ဆိုတာ ကျွန်တော်တို့ မသိရသေးပါဘူး။ ဒါပေမဲ့ ကျွန်တော်တို့နိုင်ငံတစ်လွှားက အမေရိကန်မွတ်စလင် အများအပြားဟာ စိုးရိမ်ပူပန်ပြီး ထိတ်လန့်ကြောက်ရွံ့နေကြတာကို ကျွန်တော်တို့ သိပါတယ်။

ယုံကြည်မှုနဲ့ နောက်ခံအမျိုးမျိုးရှိသူ အမေရိကန်အားလုံးအနေနဲ့ ပူဆွေး ငိုကြွေးနေကြတဲ့ လူမှုအသိုင်းအဝိုင်းတစ်ခုနဲ့အတူ ညီညီညွတ်ညွတ် ဆက်လက်ရပ်တည်သွားရမှာဖြစ်ပြီး ဘယ်သူဖြစ်လို့၊ ဘယ်သူနဲ့တူလို့ ဒါမှမဟုတ် ဘယ်လို ကိုးကွယ် ဝတ်ပြုလို့ဆိုပြီး ဘယ်သူတစ်ဦးတစ်ယောက်ကိုမှ ပစ်မှတ်မထားသင့်ကြောင်း အခိုင်အမာပြောကြားရမှာဖြစ်ပါတယ်။

ကမ္ဘာတစ်ဝန်းလုံးက လူတွေကို အစွန်းရောက်အကြမ်းဖက်မှုခံရမှုကနေ ကာကွယ်ရေးအတွက် ကျွန်တော်တို့ရဲ့ တိုက်ပွဲဟာ ကိုယ်ရောစိတ်ပါဆင်နွှဲရမယ့် အဆုံးစွန်တိုက်ပွဲတစ်ခုပါ။ ဒီအပတ် ထိပ်သီးအစည်းအဝေးနဲ့အတူ ဒုက္ခဆင်းရဲနဲ့ သေခြင်းတရား ကိုသာပေးနေကြတဲ့ အကြမ်းဖက်သမားတွေနဲ့မတူဘဲ ဒါဟာ အခွင့်အလမ်း၊ တရားမျှတမှုနဲ့ ဂုဏ်သိက္ခာတွေရှိရာဆီသွားရာ လမ်းမှန်ကိုရောက်အောင် ညွှန်ပြတဲ့ လွတ်လပ်လူမှုအဖွဲ့အစည်းတွေနဲ့ မတူကွဲပြား လူမှုအသိုင်းအဝိုင်းများဖြစ်ကြောင်း နောက်ထပ်တစ်ခါ ကျွန်တော်တို့ ပြသလိုက်ကြပါစို့။

အထက်ပါစာမှာ အမေရိကန်သမ္မတ ဘားရက်အိုဘားမား ရေးသားခဲ့သော ၂၀၁၅ ခုနှစ် ဖေဖော်ဝါရီလ ၁၇ ရက်နေ့ထုတ် လော့(စ)အိန်ဂျလိ(စ)တိုင်း(မ) သတင်းစာပါ ဆောင်းပါးဖြစ်ပါသည်။ ထိုနေ့တွင်ပင် ကမ္ဘာအရပ်ရပ် နိုင်ငံပေါင်း ၆၀ ကျော် မှ အစိုးရအရာရှိများ၊ ဘာသာရေးခေါင်းဆောင်များ၊ အရပ်ဘက်လူမှုအဖွဲ့အစည်းနှင့် လူမှုအသိုင်းအဝိုင်းခေါင်းဆောင်များ၏ သုံးရက်ကြာ ထိပ်သီးအစည်းအဝေးတစ်ရပ်ကို အမေရိကန်အစိုးရ အိမ်ဖြူတော်တွင် စတင်ကျင်းပပြု လုပ်ခဲ့ပါသည်။

ထိုထိပ်သီးအစည်းအဝေးတွင် တက်ရောက်လာသော ပုဂ္ဂိုလ်များက အစွန်းရောက် သဘောတရားအယူအဆများ၏ အန္တရာယ် မှ မိမိတို့ ချစ်ခင်ရသူများကို တားဆီးကာကွယ်ရန် လူမှုအသိုင်းအဝိုင်းများအား စွမ်းအားမြှင့်တင်ကူညီရေးအတွက် ဆွေးနွေးခဲ့ ကြသည်။ တိုက်တိုက်ဆိုင်ဆိုင်ပင် ထိုအစည်းအဝေးကျင်းပချိန်တွင် အစ္စလာမ္မစ်နိုင်ငံတော် (ISIL) တိုက်ဖျက်ရေး ကိုင်တွယ်ဆောင်ရွက်မှုနှင့် ပတ်သက်၍ အိုဘားမားအပေါ် မထောက်ခံမှုမှာ CNN သတင်းဌာန၏ စစ်တမ်း ကောက်ယူမှု အသစ်တစ်ခုအရ ၅၇ ရာနှုန်းအထိ မြင့်တက်လာနေချိန်လည်း ဖြစ်နေပါသည်။

အစည်းအဝေး ဒုတိယရက်ဖြစ်သော ဗုဒ္ဓဟူးနေ့တွင် သမ္မတ အိုဘားမားက မိမိတို့မှာ မစ္စလာမ်ဘာသာနှင့် စစ်ဖြစ်နေခြင်း မဟုတ်ဘဲ အစ္စလာမ်ဘာသာကို ဖောက်လှဲဖောက်ပြန်ပြုနေသူများနှင့် စစ်ဖြစ်နေခြင်းသာဖြစ်ကြောင်း ပြောကြားခဲ့ပြီး မိမိတို့ နိုင်ငံများက အစ္စလာမ်ဘာသာကို နှိပ်ကွပ်ရန် ဆုံးဖြတ်ထားသည်ဟူသော အယူအဆအား လက်မခံကြရန် တိုက်တွန်းပြော ဆိုခဲ့သည်။ မိမိတို့၏ရန်သူမှာ အစ္စလာမ်မဟုတ်ဘဲ အကြမ်းဖက်မှုသာဖြစ်ကြောင်း သူက ခုခံကာကွယ်ခဲ့သည်။

မွတ်စလင်ဘာသာရေးခေါင်းဆောင်များက အမေရိကန်အစိုးရသည် အစ္စလာမ္မစ်များထံမှလာသော ခြိမ်းခြောက်မှုများကိုသာ ကျဉ်းမြောင်းစွာ အလေးထားနေကြောင်း ဝေဖန်ခဲ့ကြသည်။ အမေရိကန် ရီပတ်ဘလီကန်ပါတီဝင်များကမူ ခြိမ်းခြောက်မှုကို ချဉ်းကပ်ရာတွင် ဘောင်ကျယ်လွန်းသည်ဟု အစိုးရကို ပြစ်တင်ပြောကြားခဲ့ပြီး ယခုထိပ်သီးဆွေးနွေးပွဲကိုလည်း အရည်မရ၊ အဖတ်မရဟု ပယ်ပယ်နယ်နယ် ဝေဖန်ခဲ့သည်။

အိုဘားမား၏ မိန့်ခွန်းမှာ ရီပတ်ဘလီကန်များ၏ တင်းမာသော သဘောထားအပေါ် မွတ်စလင်ခေါင်းဆောင်များ၏ စိုးရိမ် ပူပန်မှုကို ရောင်ပြန်ဟပ်နေပုံရပြီး အစ္စလာမ်ဘာသာရေးကို တမန်တော်မိုဟာမက်အမည် အသုံးချကာ အကြမ်းဖက်လုပ်ရပ် များ လုပ်ဆောင်နေကြသော အကြမ်းဖက်သမားများ အန္တရာယ်မှ ခွဲခြားပြသရန် ကြိုးပမ်းခဲ့ခြင်းဖြစ်ကြောင်း သိသာပါသည်။

“သူတို့က သူတို့ကိုယ်ကို ဘာသာရေးခေါင်းဆောင်တွေ၊ အစ္စလာမ်ကို ကာကွယ်နေတဲ့ ဘာသာရေးစစ်သည်တော်တွေအဖြစ် ပုံဖော်ဖို့ ကြိုးစားနေကြ တယ်။ ဒါကို ကျွန်တော်တို့ ဘယ်တော့မှ လက်မခံပါဘူး။ ဘာဖြစ်လို့လဲဆိုတော့ ဒါက လိမ်ညာမှု တစ်ခုမို့လို့ပဲ။ ပြီးတော့ သူတို့လိုချင်တဲ့ ဘာသာရေးတရားဝင်မှုကို ဒီအကြမ်းဖက်သမားတွေအတွက် ခွင့်မပြုသင့်ဘူး။ သူတို့ ဟာ ဘာသာရေး ခေါင်းဆောင်တွေမဟုတ်ဘဲ အကြမ်းဖက်သမားတွေသာဖြစ်တယ်”ဟု သူကဆိုပါသည်။

လူထွန်း

Ref: (1) President Obama: Our fight against violent extremism By Barack Obama, Los Angeles Times

(2) Obama: Terror, Not Islam, Is the Enemy, Foreign Policy

Leave a Reply

Your email address will not be published.